Бобур Йўлдошев: "ОЧЛ гуруҳ босқичига чиқиш битта ўйинга боғлиқ эканлигини ва масъулиятини барчамиз тушуниб турибмиз"

Кеча АГМК жамоаси делегацияси Тошкент-Дубай-Доҳа йўналиши бўйлаб Қатар пойтахтига етиб борди. Биз эса бу борада ҳимоячи Бобур Йўлдошевнинг фикрлари билан қизиқдик.

- Ассалому алейкум. Бобур айни пайтда кайфиятлар қандай? Жамоа Қатарга яхши етиб бордими?

- Қатар пойтахтига соғ ва саломат етиб келдик. Кайфият аъло даражада. Насиб қилса ўзимизга керакли бўлган натижа яъни ОЧЛ гуруҳ босқичига чиқишга ҳаракат қиламиз. 

- АГМКнинг ОЧЛ гуруҳ босқичига йўлланма олиши битта ўйинга боғлиқ эканлиги қай даражада босим юклайди?

- Барчаси битта ўйинга боғлиқ эканлигини ва босимни барча тушуниб турибди. Лекин ҳар доим максимал даражада ҳаракат қилиб ижобий натижага эришиш мумкин. Қўлимиздан келганча бор кучимизни ишга соламиз. 

- Авваллари клубларимиз февраль ойида хорижда йиғинни якунлаб, спарринг рақиблар билан ўйнаб сўнг ОЧЛдаги иштирокини бошлар эди. Энди бўлса вазият бошқача...

- Тўғри. Олдинги йилларда расмий ўйинлар ўтказмай туриб ОЧЛда майдонга чиқар эдик. Ички чемпионатимизда тўртта тур ўтди. Бироз бўлсада жамоа формага кириб олди. Мазкур жараён бизга қўл келишига ишонаман. "Ал Гарафа" билан бўладиган ўйинда мухлисларни хурсанд қилишни ният қилганмиз. Ўйлайманки ортимизга ОЧЛ гуруҳ босқичи йўлланмаси билан қайтамиз. 

- "Ал Гарафа"ни ўрганиш жараёни қандай бўляпти?

- Бу ерга кеча етиб келдик. Муҳитга тезроқ мослашишимиз лозим. Албатта рақибни ҳам кучли ва кучсиз томонларини ўрганмоқдамиз. 

Абдулазиз Искандаров ёзиб олди