"Барселона" - "Реал". Эрнесто Вальверде иштирокидаги матбуот анжумани

Ушбу баҳсдан олдин Каталония клуби устози Эрнесто Вальверде иштирокида матбуот анжумани бўлиб ўтди.

Рақиб ҳақида

- "Реал"га қарши баҳслар доимо ўзгача аҳамиятга эга. Биз ва рақиб финалга чиқишни истаймиз. Бу ярим финалда фаворит йўқ, ҳамма нарса бўлиши мумкин. "Реал" ҳар доим "Камп Ноу"да жуда яхши ўйнайди. ЛаЛигадаги ўйинда биз ғолиб чиққандик, ўша пайтда рақиб оғир рухий ҳолатда эди, аммо энди "Қироллик клуби" учрашувга тайёр.

"Барселона" таркиби ҳақида

- Таркибимизда кучли футболчилар йиғилган, уларнинг орасида дунёнинг энг яхши ўйинчиси ҳам мавжуд, аммо "Реал"да ҳам энг яхши футболчилар ўйнайди.

Лионель Мессининг ҳолати ҳақида

- Агар Месси бу ўйинда иштирок эта олса, уни майдонга тушираман, бундай бўлмаса - у тикланишни давом эттиради. Месси биланми ёки усиз услубимиз ўзгармайди. "Барселона" ғалаба қозониш, устунлик қилиш ва голлар уришни кўзлаган.

Жамоанинг ўйин тақвими ҳақида

- Ҳозир тақвим борган сари зичлашмоқда. Қисқа муддат ичида "Реал" билан иккита ўйин ўтказишимиз ва Чемпионлар лигасида майдонга тушишимиз керак. Ҳаммасига улгуриш лозим - дейди Вальверде.

Хўш, Месси "Реал"га қарши баҳсда ўйнайдими?

Расман маълум эмас, аммо Лео "Барселона" қайдномасига киритилди. Каталония клуби учрашув олдидан у таркибда бўлиши ёки бўлмаслиги ҳақида қарор қабул қилади. Лео Месси 5 февраль куни каталонияликлар машғулотида иштирок этди. Машғулотнинг илк 15 дақиқаси ОАВ учун очиқ бўлди, шу сабабли Месси ҳақида бир нарса дейиш қийин.

"Барселона"нинг "Реал"га қарши ўйин учун қайдномаси

Дарвозабонлар: Тер Штеген, Инаки Пенья.
Ҳимоячилар: Семеду, Пике, Ленгле, Мурильо, Альба, Вермален, С.Роберто.
Ярим ҳимоячилар: Ракитич, Бускетс, Коутиньо, Артур, Боатенг, Аленья, Видал.
Ҳужумчилар: Суарез, Месси, Мальком.