"Арсенал" мухлисаси Севара Назархондан "CА" учун эксклюзив

Шунда танишларимидан бири нима учун стадионга ташриф буюришини айтиб, Севара Назархоннинг "Ватаним" қўшиғини ҳиргойи қилар эди.

"Сен  шохлари осмонларга
Тегиб турган чинорим ўзингсан,
Ота десам,
Қизим деб,
Бош эгиб турган ўзинг,
Улуғимсан, ВАТАНИМ ..."

Айнан шу қўшиқни тинглаш учун стадионга келар экан. Ўйин аввалида ва танаффус пайтида янграйдиган Севара Назархоннинг ана шу қўшиғи кўпчиликка манзур бўларди.

Бежизга Севара Назархон ҳақида эсламадим. Куни кеча "Арсенал" ва "Челси" жамоалари ўртасида бўлиб ўтган ўйиннинг натижаси қолиб, футбол ва шоу-бизнес оламида санъаткоримизнинг "Эмирейтс" стадионида "Арсенал" футболкасида тушган сурати оммага тарқалди. Фурсатдан фойдаланиб, Абдураҳмон Фозилов ёрдамида "Арсенал"нинг ўзбекистонлик мухлисасидан интервью олдик.

"2000 йилдан буён футболга қизиқишим катта. Доимий кузатиб бормайман-ку, лекин имкон бўлди дегунча "Арсенал" иштирокидаги ўйинларни томоша қилишга ҳаракат қиламан. Бу жамоани бежизга танламаганман. Ҳар доим Лондонга келганимда мен шаҳарнинг шимолий ҳудудига жойлашаман. Бу ҳудуд эса "тўпчилар"ники. Шунинг учун ҳам бу клуб менинг "уй жамоамга" айланган. Менимча энди мен, на "Барселона", на "Интер"га мухлислик қила оламан", - дейди Севара Назархон.

Афсуски, Арсен Венгер шогирдлари шу куни мағлубиятга учрадилар. Бу мағлубият Севара Назархонга қандай таъсир қилди?
- Бундан ёмон кунлар ҳам бўлган. Шундай мавсумлар бўлди-ки, клуб премьер-лиганиниг ўртамиёналари қаторига тушиб кетди. Алам ва аччиқланиш бўлади. Лекин бунинг бир ўйин эканини унутмаслигимиз керак. Футболда бир жамоа доим ҳам ғалаба қозонавермайди. Премьер-лига эса шуниси билан ҳам қизиқ. Турнир жадвалидаги сўнгги жамоа ҳам бу ерда пешқадамни мағлуб этиши мумкин.

Нодирхўжа Юлдашев.