Антони "Бавария" таклифини рад этганини айтди. У "Бетис"га берган сўзида турган

Қанот ҳужумчиси Антони "Манчестер Юнайтед"дан "Бетис"га 22+3 миллион евро эвазига ўтди. Маълум қилинишича, трансфер ойнасининг сўнгги кунида "Бавария" бразилиялик футболчини 30 миллион еврога ўз сафига қўшиб олишга уринган ва унга йилига 7 миллион евро маош билан шартнома таклиф этган.

"Келишув якунланишидан бир кун олдин "Бавария" раҳбарияти билан суҳбатлашдим. Бироқ уларга "Бетис" билан келишув 95 фоиз якунланганини ва сўзимда туришимни айтдим. Мен буни ҳурмат ва муҳаббат туфайли, шунингдек, бу ерда жуда бахтли эканлигимни билганим учун қилдим.

Улар ҳақиқатан ҳам менга 7 миллион евро таклиф қилганми ёки йўқми, билмайман. Жаҳон даражасидаги "Бавария"га бўлган ҳурматим билан, қарор қабул қилиш мен учун осон бўлди. Келажакда нима бўлишини билмайман, лекин жуда хотиржамман.

Бештадан ортиқ клуб мен билан боғланди. Аммо ҳар доим айтганимдек, "Бетис" менинг устувор танловим эди," - деди Антони CОPE билан суҳбатда.