Superliga starti oldidan. Baxtiyor Ashurmatov: "Chempionlik uchun kurash 3 ta jamoa o'rtasida kechadi, bu yil qiziqarli Superliga ko'ramiz"

Jamoalar o'tgan vaqt davomida yangi mavsumga munosib tayyorgarlik olib borishdi, har kim o'z imkoniyatidan kelib chiqib tarkibni shakllantirdi. Yangi nomlarni qo'shib oldi. Maqsadlar esa ulkan. OKMK - "Buxoro" uchrashuvi bilan boshlanadigan dastlabki tur oldidan tajribali murabbiy Baxtiyor Ashurmatovning fikrlari bilan qiziqdik. 

"Muxlislar kutgan chempionatimiz ham boshlanmoqda. Bu yilgi mavsum qiziqarli o'tishi kutilmoqda, chunki jamoalar soni avvalgidan ko'paydi. Superligada qolish uchun kurashuvchan jamoalar soni oshdi. Fikrimcha, chempionlik uchun "Neftchi", "Paxtakor" va "Nasaf" kurash olib boradi. "Navbahor", OKMK bu jamoalarga bosh og'riq bo'lishi mumkin. Lekin aytganimdek oltin medallarga harakat 3 ta jamoa o'rtasida kechishini kutyapman. 

1-tur uchrashuvlariga kelsak, ikkita "Bunyodkor" - "Neftchi", "Nasaf" - "So'g'diyona" uchrashuvlari qiziqarli va murosasiz kechishini ayta olaman. Qolgan uchrashuvlarda maydon egalarining imkoniyatlari ko'proq. OKMK, "Paxtakor", "Navbahor" o'z maydonidagi o'yinlarni g'alaba bilan boshlashini taxmin qilaman. "Qo'qon-1912" - "Andijon" vodiy derbisida qo'qonliklarda g'alaba uchun imkoniyat ko'proq. Bu yil Qo'qonga Superligada omad tilayman. "Qizilqum" - "Surxon", "Xorazm" - "Sho'rtan" uchrashuvlarida imkoniyat teng. Chempionat chiroyli o'tishini va hamma jamoalarga omad yor bo'lishini tilab qolaman",- deydi Baxtiyor Ashurmatov.