Ro'ziqul Berdiev: "Afsuski, natija biz kutgandek bo'lmadi"

- Dastlab o'yin haqida fikringiz?

- "Neftchi" jamoasi bugun qahramonlik ko'rsatib juda zich himoyalandi va shuning evaziga zafar quchdi. Bizga esa hujumda sovuqqonlik va vaziyatlarni golga aylantirish etishmadi. Raqib to'liq tarkib bilan o'ynab turganida ham, bir o'yinchi kam bo'lib qolganida ham tashabbusga ega edik, ammo omad kelmadi. Afsuski, natija biz kutgandek bo'lmadi, agar g'alaba qozonganimizda turnir jadvalidagi holatni yaxshilab olgan bo'lardik. Umuman olganda, futbolchilarimizga etiroz yo'q, lekin hujumchilarimizdan ko'proq sovuqqonlikni kutgandik. Qolaversa, Zafarmurod jarima maydonchasi ichida yiqitilganida o'sha vaziyatga ham etiroz bildirdik.

- "Nasaf"ning amaldagi chempion sifatida nega oxirgi o'yinlarda omadi kelmayapti?

- O'zimiz ham shunga hayronmiz. Raqiblar bizga qarshi ancha zich himoyalanmoqda va ularning himoyasini yorib o'tish oson bo'lmayapti. Uyda "Andijon" bilan o'ynaganimizda ham shu holat kuzatilgandi. Bu albatta yoqimsiz holat, lekin hammasi o'z qo'limizda, mavsum davom etyapti va buyog'iga keyingi o'yinlarga tayyorgarlik ko'ramiz.

- Akmal Mozgovoyning ketishi jamoa yarim himoyasini susaytirdimi?

- Akmalning ketgani tarixga aylanib bo'ldi. Biz qo'l ostimizdagi futbolchilar bilan maqsad sari intilishimiz kerak. Menimcha, Sardor bilan Murod yarim himoyada Akmalning yo'qligini bildirmayapti. Odatda natija yaxshi bo'lmasa, har xil savollar tug'iladi. Futbolda shunaqa: kimdir jamoadan ketsa, bu boshqa bir futbolchining "ochilishiga" sabab bo'ladi. Tarkibimizda bo'lmagan futbolchilar o'rnini yoshlar bilan to'ldiramiz. Bugun uch nafar hujumchi bilan harakat qilganimizga qaramay, o'zimiz xohlagan natijaga erisha olmadik.

- "Neftchi"ning qaysi jihatlarini takidlab o'tgan bo'lardingiz?

- "Neftchi" ko'proq himoyadan o'yinni quradi. Bugun ham shunday bo'ldi. Ular bir kishi kam bo'lib qolgach, himoyaga yanada ko'proq etibor qaratdi va hujumda bir nafar o'yinchini qoldirib boshqalar asosan himoyalanish bilan vaqtni o'tkazdi. Bu esa jamoaga natija olib keldi.