PREVYU. Levchenko va "Neftchi"ning omadli yurishi davom etadimi?

"Neftchi" - "Navbahor" o'rtasidagi uchrashuvlar azaldan o'zining shiddati, azarti, to'qnashuvlarga boy o'tishi bilan qolgan derbilardan ajralib kelgan. Garchi so'nggi yillarda bu jamoalar o'rtasidagi o'yinlarga qiziqish biroz kamaygan bo'lsada, principiallik yo'qolmagan. Derbi o'z nomi bilan derbi. Ayniqsa, bugungi uchrashuv har tomonlama muhimlilik darajasi o'ta yuqori. 

Neftchi Fozil Musayev - 4'

Superliga. 22-tur 18/10/2022, 18:30 2 : 1 Tugadi

Navbahor Jamshid Iskanderov - 29', Zoran Marushich - 64'

45'

90'

4'  Fozil Musayev

29'  Jamshid Iskanderov

64'  Zoran Marushich

Match-senterda ochish

FARG'ONADAN 18 YILDAN BERI G'ALABASIZ QAYTAYOTGAN "LOCHINLAR" 

"Navbahor" "Neftchi"ni mehmonda so'nggi bor 2004 yil mag'lub etgan. Samvel Babayan shogirdlarining Farg'onadagi g'alabasiz seriyasi 14ta o'yinni tashkil qiladi. Superligadagi umumiy o'zaro o'yinlarda ham "Neftchi" katta ustunlik qilmoqda. 26 g'alaba, 13 mag'lubiyat. 16 uchrashuvda durang qayd etilgan. 

Farg'onada bo'lib o'tgan so'nggi 5ta uchrashuv:

15.08.2014 yil

Neftchi - Navbahor  1:0

04.04.2015 yil.

Neftchi - Navbahor  1:0

12.03.2016 yil

Neftchi - Navbahor  1:0

19.08.2017 yil

Neftchi - Navbahor  1:1

08.08.2018 yil

Neftchi - Navbahor  2:1

"NEFTCHI" OSMONIDA "OQ BULUTLAR" 

Birinchi davradan so'ng autsayderlar qatoriga tushib qolgan "Neftchi" ikkinchi davrani kutilganidandan yaxshi o'tkazmoqda. Farg'onaliklar 8ta uchrashuvda jami 14 ochko ishlashni uddasidan chiqishdi va faqatgina "Paxtakor"ga mag'lub bo'lishdi. Bu borada Superliga jamoalari orasida katta sakrash aynan "Neftchi"da kuzatildi. Vitaliy Levchenko qisqa vaqt ichida natija keltirishni uddasidan chiqa olayotgani tahsinga sazovor. 

"CHINORLAR" UYGA QAYTMOQDA 

Ha, so'nggi paytlarda "Neftchi"ni turli nomlar, laqablar bilan nomlashayotgani qulog'imizga chalinayotgandi. Lekin barchamiz uchun ular "chinorlar" bo'lib qolaveradi. Jamoa nihoyat uzoq vaqtdan so'ng uyga qaytish arafasida bo'lib turibdi. "Istiqlol" stadioni yana katta uchrashuvlarni qabul qilishga shay holatda. Jamoa oxirgi marotaba mazkur arenada 2021 yilning 14 noyabr kuni Pro liganing 23-turida "Buxoro" bilan to'qnash kelgan, o'yin 1:1 hisobida yakunlangandi. Vitaliy Levchenko boshchiligida jamoa azolari mashg'ulot ham o'tkazishga erishdi. 

YURIY SARKISYAN FARG'ONADA 

Darhaqiqat, "Neftchi"ni brend darajasiga olib chiqqan, bu klub bilan ko'plab yutuqlarga erishgan shaxs so'zsiz Yuriy Vazgenovich Sarkisyandir. Klub matbuot xizmatining malum qilishicha, murabbiy bugungi uchrashuv mehmoni bo'ladi va bahsni ochib beradi. Sarkisyanni "Neftchi"dan qay tariqa xaydalgani hamon yodimizda. Endilikda klub o'zaro do'stlik rishtalarini tiklasa ajab emas.

"Men har doim ushbu jamoaga muxlislik qilganman va bundan keyin ham muxlis bo'lib qolaman. Buni yodda tutishingizni istayman. Jamoani kim boshqarishi, unda kimlar ishlashi ahamiyatsiz. "Neftchi" hayotimning bir parchasi bo'lib qoladi",- degan edi Sarkisyan

"OLTIN DUBL" ORZUSIDAGI "NAVBAHOR"

O'zbekiston kubogi finaliga yo'l olgan "Navbahor" chempionatda ham oltin medallar yo'lida hali kurashdan chiqqani yo'q. Peshqadam "Nasaf" bilan oradagi farq 2 ochkoni tashkil qiladi. Taqvimga nazar solsak, eng qulay raqiblar keyingi turlarda "lochinlar"ga ro'baro' kelishini ko'rish mumkin. 

"Olimpik" (uyda) 

"Lokomotiv" (safarda) 

"Metallurg" (safarda) 

AGMK (uyda)

"Neftchi" o'rtamiyonalar safida mavsumni yakunlashi ehtimoli mavjud. Biroq ularni oldinda "Nasaf" va AGMK bilan oson bo'lmagan bellashuvlar kutmoqda. "Metallurg" va "Surxon" ham ancha "bosh og'riq" vazifasini o'tab beradi. Jamoa ayni damda ajoyib sport formasida. Kayfiyat va ishonch qaytgan. 

Demak, barcha futbol ixlosmandlarini Farg'onadagi "Istiqlol" o'yingohiga chorlab qolamiz. Qolgan mulohazalarga o'yindan keyin yana bafurja to'xtalamiz. Maroqli tomosha!