"Oq-tepa": Jamoamiz fidoyisi faoliyatini yakunladi

Millionlar o'yiniga ilk qadamlarni “Paxtakor” futbol maktabida qo'ygan Mirzaahmedov 2000 yilda tashkil topgan jamoamizda 14 yil davomida to'p surdi. Klubni ikkinchi ligadan 1-liga yo'l olishidan tortib, barcha yaxshi-yomon kunlarida birga bo'ldi. Hech qachon jamoani qiyin vaziyatda tashlab ketmadi. SHuning uchun uni jamoa ichida hurmati beqiyos.

O'zining ajoyib o'yinlari orqali jamoadoshlari orasida “Ziko” nomini oldi va “Oq-tepa”da shu kunga qadar qaysi murabbiy ishlamasin u klubning asosiy o'yinchisi bo'lib keldi. Faoliyati davomida ko'p marta jamoa va jamoadoshlarini qiyin vaziyatlardan olib chiqib keta oldi. Yarim himoyachi chiroyli to'p uzatishlari-yu, kutilmagan qarorlari orqali raqiblarini shoshirib qo'yardi. Qiyin vaziyatlarda barcha og'irlikni elkasiga olishni uddalardi.

Aslida yarim himoyachi bemalol yana bir-ikki mavsum to'p sura olardi. Ammo o'zi butsasini mixga ilishni maqul deb topdi. Klub rahbariyati ham futbolchining qarorini hurmat qilgan holda Zokir Mirzaahmedovga omad tiladi!

MA'LUMOT UCHUN
ZOKIR MIRZAAHMEDOV
Tug'ilgan sanasi: 06.03.1984
Tug'ilgan joyi: Toshkent
Ampluasi: yarim himoyachi
Bo'yi: 170 sm. Vazni: 63 kg.