O'FA va "Lokomotiv" Ravshan Muqimovni taqdirladi

Shu munosabat bilan kecha bo'lib o'tgan Pro liga 1-turidan o'rin olgan "Olimpik" – "Lokomotiv" uchrashuvi paytida O'FA hamda "Lokomotiv" PFK rahbariyati tomonidan taqdirlash marosimi tashkil etildi.

Tadbirda O'FA birinchi vice-prezidenti Ravshan Ermatov O'FA tasis etgan "O'zbekiston futboli rivojiga qo'shgan hissasi" uchun maxsus ko'krak nishonini topshirdi. Shuningdek, "Lokomotiv" PFK vice-prezidenti To'labek Akramov naqshinkor ramka ichiga solingan "Muqimov 60" yozuvli futbolkani klub sovg'asi sifatida taqdim etdi. Taqdirlash marosimida O'FA prezidenti maslahatchisi Avaz Azizxo'jaev bilan O'FA faxriylar Kengashi raisi To'lagan Isoqov ham ishtirok etdi.

Malumot o'rnida shuni aytishimiz mumkin, Ravshan Muqimov bir necha yillardan beri "Lokomotiv"dagi faoliyati orqali o'zbek futboli rivojiga o'z hissasini qo'shib kelmoqda. 2002 yil "Lokomotiv" PFK tashkil etilganidan beri Ravshan Qobilovich klub sport direktori lavozimida faoliyat yuritib kelyapti. Ravshan Muqimov bir qancha shogird etishtirib chiqqani bilan ham futbolimiz kishilari orasida hurmat va ehtirom qozongan.

Fursatdan foydalanib, Ravshan Muqimovni qutlug' 60 yoshi bilan muborakbod etamiz. U kishiga uzoq umr, sihat-salomatlik hamda o'zbek futboli rivoji uchun hissa qo'shishda davom etishlarini tilaymiz.