Mirjalol Qosimov: "Mag'lubiyatga loyiq o'yin ko'rsatmadik"

- Avvalambor, muxlislarga minnatdorlik bildiraman. Chunki ajoyib atmosferada futbol guvohi bo'ldik. O'yinga keladigan bo'lsak, mag'lubiyatga loyiq o'yin ko'rsatmadik. Birinchi bo'limda o'tkazib yuborgan golimiz shubhali tuyulmoqda, ofsayd bormidi yo'qmidi, bu o'zlariga havola. "Andijon" jamoasini g'alaba bilan tabriklayman. Ikkinchi bo'limda juda ko'p mehnat qildik, lekin "Andijon" jamoasi tartibli himoyalandi va ularning darvozasiga yo'l topa olmadik, raqib darvozaboni ham yaxshi o'yin namoyish qildi. Bir qancha vaziyatlarda, shuningdek, so'nggi daqiqalarda ham Xurshid vaziyatdan gol urishi mumkin edi. "Andijon" jamoasiga kelgusi o'yinlarda omad tilab qolaman.

- Bugun jamoangizga g'alaba uchun nimalar etishmadi deb o'ylaysiz?

- Yaratilgan vaziyatdan gol urish kerak. Birinchi bo'limda ham ikkinchi bo'limdagi kabi shijoat bilan o'ynash kerak edi. Raqib bunday yaxshi himoyalanib turgan vaqtda ko'p ham vaziyatlar bo'lmaydi. Lekin shunda ham biz yaxshi vaziyatlarga ega bo'ldik, biroq bundan foydalana olmadik.

- Ikkinchi bo'limda Asadbek Sobirjonov maydonga tushganidan keyin OKMK jamoasining hujumlari ko'paydi. Uni asosiy tarkibda tushirsa bo'lmasmidi?

- Agarda uni tushirsak ham lekin degan savol berilishi mumkin edi. Haqiqatdan ham u o'yinga yaxshi qo'shilib ketdi, biroq tortishuvli vaziyatda o'zini bunday tutishi kerak emasdi. Shundoq ham vaqt biz uchun ishlamayotgandi. Bunday holatda faqatgina futbol o'ynash kerak edi.