Mirjalol Qosimov: "Futbolni aldab bo'lmaydi"

"Avvalo barcha yurtdoshlarimizni yaqinlashib kelayotgan Vatanimizning mustaqillik bayrami bilan chin yurakdan tabriklayman. Bugun ajoyib va hujumkor futbol guvohiga aylandik. O'yin qiziqarli va vaziyatlarga boy o'tdi. Har ikkala jamoada golli vaziyatlar ko'p bo'ldi. Agarda tezroq uchinchi golni kiritganimizda, bahsni xotirjam yakunlardik. Kubok o'yini yaqinda o'tkazganimiz sababli bugun jamoamizda charchoq sezildi. Baribir futbolni aldab bo'lmaydi. Biz "Surxon"ga nisbatan bir kun kech o'yin o'tkazdik va uchrashuv ekstra taymlargacha cho'zilgani bugungi bahsda futbolchilarning jismoniy holatiga tasirini ko'rsatdi. Jamoa to'liq tiklanishga ulgurmagandi. SHu bois ham o'yinda to'liq nazoratni ushlash qiyin bo'ldi. Lekin shunga qaramay jamoam bugun oxirigacha kurashdi. Futbolchilar o'zlarida kuch topib, ko'plab vaziyatlar yaratishdi. Muhim g'alabani qo'lga kiritdik. Bugungi o'yin uchun yigitlarga rahmat aytaman va bizni qo'llab-quvvatlagan muxlislarimizga minnatdorchilik bildiraman. AGMK aynan muxlislarni xursand qilish uchun o'ynaydi. Bu o'yin endi tarix. Biz endilikda kubok doirasidagi "Andijon"ga uchrashuvga jiddiy tayyorgarlik ko'ramiz", dedi olmaliqliklar bosh murabbiyi.