Kamoliddin Tojiev: "Barcha o'yinlarda oxirigacha kurashyapmiz"

- Dastlab o'yin haqida fikringiz?

- Bugun o'yinni yaxshi boshladik. Afsuski, yo'q joydan gol o'tkazib yubordik. Bu esa futbolchilarimizga tasir qildi. Keyinroq o'zimizga kelib oldik va vaziyatni o'nglashga harakat qildik. Oxirgi soniyalargacha hamma o'yinlarda kurashyapmiz, buning uchun futbolchilarimizga rahmat aytaman. O'ylaymanki, qiziqarli o'yin bo'ldi. "Dinamo" ham juda yaxshi, futbol o'ynaydigan jamoa.

- "Paxtakor"ni jadvalning yuqori qismida ko'rishga odatlanib qolganmiz. Lekin hozir vaziyat shundayki, boshqalar ilgarilab ketdi. Bu haqda nima deya olasiz?

- Birinchi davrada ko'p yutqazib qo'ydik. Bu esa hozir ham tasir qilyapti. Lekin oxirigacha kurashamiz.

- Ketma-ket o'yinchi almashtirishni qanday izohlaysiz?

- Futbolchilarda toliqish borligini ko'rib shu qarorga keldik. Bu bilan vaziyatni tezroq o'nglashga harakat qildik.

- Yozgi transfer oynasida Aziz Turg'unboev taklif etildi. Negadir uning imkoniyatlaridan to'liq foydalanilmayapti?

- Aziz chap qanot himoyasida ham, yarim himoyada ham birdek o'ynay oladi. Uning oldinga borib yana orqaga qaytishga bemalol kuchi etadi. Shu bois hozircha faqat qanotda o'ynatyapmiz.

- Turg'unboev, Abdixoliqov, Erkinov kabi futbolchilar bungacha legioner bo'lganlar va endiliklar "Paxtakor"da o'ynashyapti. Ammo bu futbolchilarda etakchilik qobiliyati ko'rinmayapti.

- Bir narsani unutmang, chempionatimiz darajasi ancha oshgan. Biz saviya bo'yicha arablardan kuchlimiz. Hammasi sekin-asta bo'ladi.

- Jamoangiz tarkibi kuchaydi, yangi futbolchilar qo'shildi. Muxlislar esa shunday deyishyapti: Kamoliddin Tojiev yoshlar bilan yaxshiroq ishlardi. Bu fikrga qanday qaraysiz?

- Aytganingizdek, yoshlar bilan doim ishlab kelganmiz va bundan keyin ham davom etadi. Qo'l ostimizda yaxshi futbolchilar jamlangan. Yoshlarni tarbiyalab terma jamoa darajasiga olib chiqishga harakat qilamiz. Lekin hadeb yoshlarga suyanib qolmaslik kerak. Baribir futbolda tajriba muhim rol o'ynaydi.

- Stadiondagi muhit haqida

- Muhit juda zo'r bo'ldi. Futbolchilar ham maza qilib o'ynashdi. Natijaga keladigan bo'lsak, bu erga g'alaba uchun kelgandik. Lekin durang ham yomon emas.