Ivan Boshkovich: "Bu "So'g'diyona"ning so'ngi uch yildagi eng yomon o'yini bo'ldi"

- O'yin haqida fikringiz?

- Juda kuchsiz o'yin namoyish etdik, ayniqsa birinchi taymda. Havodagi kurashlarda yutqazdik, maydon markazini ham boy berdik. Raqib uzun to'p uzatishlar orqali uchinchi zonaga tez kirib keldi, biz esa ulgurmay qoldik. Ikkinchi taymda hartugul sifatli futbol namoyish etdik, lekin gol urish uchun etarli bo'lmadi. Ammo birinchi taymda himoyadagi o'yinimiz umuman o'xshamadi.

- "Buxoro" bilan Kubok o'yinida ko'rgandikki, Jasur Jaloliddinov maydonga tushganidan so'ng jamoangiz o'yini ancha ochilgandi. O'shanda "So'g'diyona" ikkita gol urgandi. Bugun Jaloliddinov o'ynamadi. "So'g'diyona"ning o'yini Jasurga bog'lanib qolganmi?

- O'tgan gal faqat Doriev o'ynayapti deb aytildi, hozir esa faqat Jasur o'ynaydi deyilyapti. "So'g'diyona" jamoaviy o'yin ko'rsatadi, biz alohida bitta futbolchiga bog'lanib qolgan emasmiz. Bugun ko'p o'yinchilarimiz maydonda ko'rinmadi, buni esa tahlil qilib chiqamiz. Jizzaxdagi faoliyatim davomida birinchi marta qo'l ostimdagi jamoa bunday yomon o'yinni o'tkazdi. Buni tahlil qilmasak bo'lmaydi. Shaxsan men uchun bu alamli mag'lubiyat. Uch yil ichida eng kuchsiz o'yinimiz shu bo'ldi. Raqib jamoani g'alaba bilan tabriklayman."Buxoro" har o'yinni shunday o'tkazsa, o'z maydonida istalgan raqibni mag'lub eta oladi. Biz agressiv futbol ko'rsatishimiz kerak edi, ammo hech narsa o'xshamadi. 

- Mutaxassis sifatida Kubok finalida qanday natija kutyapsiz?

- Final o'z nomi bilan final. Bunda saviya jihatdan kuchsiz ko'ringan jamoa ham yaxshi o'ynab yutib qo'yishi mumkin. Chunki final bitta o'yindan iborat va etibor ham shunga yarasha bo'ladi. "Buxoro" - kurashuvchan jamoa, Kubok finalida ham jiddiy kurashsa kerak. Men omad tilayman.