Elit OCHL guruh bosqich yakunlari: kim uchun omadli, kim uchun omadsiz

Ushbu bosqich yakunlariga ko'ra, har ikkala mintaqada keyingi bosqichga yo'l olgan 8tadan omadli jamoalar malum bo'ldi.

SHARQ mintaqasi: Yaponiyaning uch klubi keyingi bosqichda

Biz Sharq mintaqasini ko'p ham kuzatmaymiz, muxlislarga ham unchalik qiziq emas. Bazan jamoalar nomini va qaysi davlatdan ekanini unutib qo'yamiz. Bir paytlari "Bunyodkor" Sharq mintaqasida o'ynaganida maza qilib ko'rardik. Avstraliyaning "Adelaida Yunayted", Janubiy Koreyaning "Poxang Stilers" kabi klublari bilan kechgan o'yinlarni bir eslang. Qanday davrlar edi-ya. Chinakam futbol muhiti hukm surgan paytlar. O'shanda nomiga ishtirok degan gap yo'q edi. Ayniqsa "Bunyodkor" OCHLni yutish uchun astoydil kurash olib borgandi.

Hozir esa Sharq mintaqasi o'zi bilan o'zi ovora. Ular qachonki G'arb jamoalariga to'qnash kelganda, ha, falonchi jamoa haliyam o'ynayapti ekan deb qo'yamiz. Lekin buyog'iga Sharq uchun Elit OCHLni yutish oson bo'lmaydi, chunki Saudiya Arabistoni klublari ancha ilgarilab ketdi. Buning ustiga yarim final va final bahslari markazlashgan tartibda yana Saudiyada o'tkaziladi.

Bu yil ham Sharq mintaqasida 12ta jamoa Elit OCHL guruh bosqichida ishtirok etib, shundan 8tasi keyingi bosqichga yo'l oldi. Qizig'i shundaki, Yaponiyaning uch klubi - "Machida Zelviya", "Vissel Kobe" hamda "Sanfrechche Xiroshima" ketma-ketlikda 1,2,3-o'rinlarni egallashdi. Keyingi o'rinni esa Tailandning "Buriram Yunayted" klubi band etdi. Yana bir qiziq jihati, Malayziyaning"Johor Darul Tazim" klubi ham kuchli sakkizlikka kirib oldi. Xitoydan bironta klub keyingi bosqichga chiqa olmadi (Ulardan uchta jamoa qatnashdi). Shuningdek, Janubiy Koreyaning "Ulsan" klubi ham musobaqadagi ishtirokini tugatdi.

1/8 final juftliklari

"Kanvon" (Janubiy Koreya) - "Machida Zelviya" (Yaponiya)

"Seul" (Janubiy Koreya) - "Vissel Kobe" (Yaponiya)

"Johor Darul Tazim" (Malayziya) - "Sanfrechche Xiroshima" (Yaponiya)

"Melburn Siti" (Avstraliya) - "Buriram Yunayted" (Tailand)

Dastlabki uchrashuvlar 3-4 mart, javob bahslari 10-11 mart kuni bo'lib o'tadi.

G'ARB mintaqasi: Kutilgan voqea ro'y berdi

G'arb mintaqasida ko'pchilik kutgan voqea ro'y berib, oldindan taxmin qilingan jamoalar keyingi bosqichga yo'l olishdi. Bizning mintaqada sensaciya kuzatilmadi. Saudiya Arabistonining uchala klubi ham keyingi bosqich masalasini hal etdi. "Al Hilol" 8ta o'yinni mag'lubiyatsiz yakunlab 22 ochko bilan birinchi bo'ldi. Keyingi o'rinni "Al Ahli" egallagan bo'lsa, Eronning "Traktor" klubi uchlikka kirib oldi.

Qatardan uchta klub qatnashgan bo'lsa, ikkitasi - "Al Duhayl" bilan "Al SAdd" bir xil 8 ochko to'plab sakkiztalikka kirib olishdi. BAAning "Sharja" klubi 8 ochko to'plab ham keyingi bosqichga o'ta olmadi, bu o'rinda to'plar nisbati pand berib qo'ydi.

Musobaqada O'zbekiston chempioni sifatida qatnashgan "Nasaf" 8 o'yindan oltitasida mag'lub bo'lib, oxirgi ikki turda bir durang va bir g'alaba qayd etib, 4 ochko to'plashni uddaladi. Boshqa jamoalar bilan solishtirganda o'rtamiyona byudjetga ega "Nasaf" shu tariqa oxirgi o'rinni band etdi. Baribir moliya va tarkib borasida qarshiliklar qolgan 11ta jamoaning hech biri bilan bahslasha olishmasdi.

1/8 final juftliklari

"Al Sadd" (Qatar) - "Al Hilol" (Saudiya Arabistoni)

"Al Duhayl" (Qatar) - "Al Ahli" (Saudiya Arabistoni)

"Shabab Al Ahli" (BAA) - "Traktor" (Eron)

"Al Vahda" (BAA) - "Al Ittihod" (Saudiya Arabistoni)

Dastlabki uchrashuvlar 2-3 mart, javob bahslari 9-10 mart kunlari bo'lib o'tadi.

Buyog'i qanday bo'ladi?

Elit OCHL reglamentiga ko'ra, musobaqaning 1/8 final bosqichi uy-mehmon tarzida o'tkaziladi. Chorak finaldan boshlab yarim final va final Saudiya Arabistonining Jidda shahrida o'tkaziladi. Xuddi o'tgan yilgi kabi Sharq va G'arb to finalgacha bir-biriga to'qnash kelmaydi.

Musobaqaning hal qiluvchi final o'yiniga hashamatli "Qirol Abdulloh" stadioni mezbonlik qiladi. Maulumot uchun, ushbu o'yingohda Saudiyaning ikki klubi "Al Ahli" va "Al Ittihod" uy o'yinlarini o'tkazadi. Stadion sig'imi 63 ming tomoshabinga mo'ljallangan.

1/8 final o'yinlari o'tib bo'ganidan so'ng 18 mart kuni chorak final uchun alohida qura tashlash marosimi o'tkaziladi. 16-18 aprelda 1/4 final o'yinlari o'tkazilsa, 20-21 aprelga yarim finallar belgilangan. Final esa 25 aprel kuni bo'lib o'tadi. Uchinchi o'rin uchun bahs o'tkazilmaydi.

Xayrulla Xoliqov