Donnarumma "PSJ"dan ketadi: "Kimdir meni jamoaning bir bo'lagi sifatida ko'rishni xohlamadi"

Futbolchi jamoani tark etishini rasman elon qildi.

"Birinchi kundan boshlab o'z o'rnimni egallash va "Pari Sen-Jermen" darvozasini himoya qilish uchun maydonda ham, undan tashqarida ham bor kuch-g'ayratimni sarfladim. Afsuski, kimdir meni endi jamoaning bir qismi bo'la olmasligimga va uning muvaffaqiyatiga hissa qo'sha olmasligimga qaror qildi. Bu meni xafa qildi va ruhiy tushkunlikka soldi.

Umid qilamanki, "Park de Prens"da muxlislarning ko'zlariga yana bir bor qarab, munosib tarzda xayrlashish imkoniyatim bo'ladi.

Agar bu sodir bo'lmasa, shuni bilingki, sizning qo'llab-quvvatlashingiz va mehringiz men uchun beqiyos ahamiyatga ega va men buni hech qachon unutmayman. Men doimo barcha his-tuyg'ular, sehrli kechalar va siz haqingizdagi xotiralarni asrab-avaylayman - siz tufayli o'zimni uyimdagidek his qildim.

Jamoadoshlarimga, ikkinchi oilamga: har bir kurashimiz, har bir kulgimiz, baham ko'rgan har bir daqiqamiz uchun minnatdorman. Sizlar abadiy mening aka-ukalarim bo'lib qolasizlar.

Bu klubda o'ynash va bu shaharda yashash men uchun katta sharaf edi. Rahmat, Parij," - deya yozdi darvozabon.

Avvalroq, PSJ bosh murabbiyi Luis Enrike Donnarummani tarkibdan chiqarib tashlagani haqida gapirgandi.