Chipta narxi Jennifer Lopes koncertidan karrasiga arzonroq, shiddati esa yuqoriroq bo'lishi kutilayotgan o'yinga prevyu

Turnir jadvalining qudratpeshvosi bo'lib turgan "Nasaf" ushbu turda ulkan muxlislar armiyasiga ega "Andijon"ni qabul qiladi. "Nasaf"ning qaynoq yozgi tanaffus chog'idagi "qaynoq" transferlari ikkinchi davraning ilk turida "muzlatgich" vazifasini o'tab berdi. Ehtimol, bo'lajak uchrashuvda ulardan jillaqursa bir nafarini baholash imkoniyati paydo bo'lar. Vodiy klubining yangi qizil liboslilari esa allaqachon jamoaga moslashishni boshladi. Jumladan, Qirg'iz Respublikasi darvozaboni Erjan Tokotaev o'tgan turning ramziy jamoasiga kiritildi. Biroq bu turda u darvoza chetidagi sochig'i bilan yuzidagi terlarini avvalgidan ko'proq artishiga to'g'ri keladi.

Ikki jamoa ham ikkinchi davrani Bazz Layter multqahramoni qiyofasidagi kayfiyatda boshladi. "Nasaf" Jizzaxda "So'g'diyona"ni qiyinchilik bilan mag'lub etgan bo'lsa, "Andijon" "Qo'qon-1912"ni ayab o'tirmadi.

Jamoalar Superliga doirasida o'zaro 47 marotaba to'qnash kelishgan bo'lib, ularning 28 tasida "Nasaf"ning qo'lib baland kelgan, 12 o'yinda tomonlar o'yindan so'ng o'zaro qo'l siqishgan bo'lsa, 7 bellashuvda qarshiliklar qarshilik qila olishmagan. Mazkur bahslarda "Nasaf" Benjamin Franklin surati aks etgan qog'ozda qayd etilgan son bilan baravar gol urgan bo'lsa, o'z davrozasidan shuning yarmidan sal ko'proq (52 marta) o'z darvozasidan to'p olib chiqqan.

Jamoalar joriy yil ikki marotaba to'qnash kelishga ulgurdi. Dastlabkisi – Superliga doirasida bo'lib, vodiydagi bellashuvda jamoalar bir-biriga bittadan to'p tuhfa qilishgandi. Ikkinchisi esa jiddiyroq – O'zbekiston Superkubogi bo'lib, unda Husayn Norchaevning penaltidan urgan golini o'yin taqdirini hal qilgandi. "Andijon" ushbu mag'lubiyat alamini olish uchun ham Qashqadaryoga tashrif buyurishi turgan gap.

Qolaversa, Maksim Shackix hozirgi qadar bosh murabbiy sifatida Ro'ziqul Berdiev jamoasini mag'lub eta olmagan. Ushbu seriya naq 8 o'yinni tashkil etadi.

Taxmin. Chipta narxi Jennifer Lopes koncertidan karrasiga arzonroq, shiddat jihatdan esa yuqoriroq bo'lishi kutilayotgan o'yinga tashrif buyurgan mezbon jamoa muxlislari 56 yoshli xonim tomoshasini tanlamagani uchun afsuslanmaydigan kayfiyatda stadionni tark etishsa kerak.

Oqil Abdubarnoev tayyorladi.