Buyuk Xitoy devorini qo'riqlayotgan musulmon sarbozlar

Uchrashuv davomida "oq bo'rilar" ustunlikka ega bo'ldi, biroq laqabi "Nasaf"niki bilan qarindosh bo'lgan Chin mamlakati vakillari o'zbekistonliklar uchun viza siyosatini bekor qilgan bo'lsa-da, ikki soatdan oshiqroq vaqt mobaynida ularning oyog'i tekkan to'pni etti metrli bojxonasidan o'tishiga yo'l qo'ymadi. 

To'g'ri, musobaqaning katta ahamiyatga ega emasligi va murabbiyning o'tmishda ko'p narsani isbotlaganini inobatga olib, asabimizni ilm-fanga, masalan, beda pres narxi uchun buzishga sarflasak ham hech kim dod-voy qilmaydi.

Shunga qaramay, Koreya bilan o'yinni inobatga olmaganda, zaxira o'rindig'ini faqatgina mehmon kelgandagina foydalaniladigan chinni idishlar singari asragan mutaxassisga savollar etarlicha topiladi.

O'zbekiston o'yin davomida katta ustunlikka ega bo'ldi. Keling, shu faktorni inobatga olgan holda, xitoyliklar haqida gaplashamiz.

Ism-familiyasini talaffuz qilishda shifokor receptiga qaragandek tasavvur hosil bo'ladigan xitoyliklar tarkibida so'nggi yillarda o'zimizga yaqinroq nomlarni ham o'qiy boshladik. Jumladan, uyg'ur millatiga mansub Umidjon Yusuf, Mutalib Imonqori, Bahrom Abduvali singari yoshlar Olimpiya terma jamoasi safida kuni kecha etnik jihatdan yaqinroq bo'lgan qardoshlariga qarshi saf tortishdi. Ha, men qo'qqisdan hassasi bilan hujum qilishi mumkin bo'lgan go'ri nurga to'lgur bobomning siyosatga qarshi chiqmaslik fikrini inkor etmoqchi emasman, nomlarni fakt o'rnida keltirdim.

2024 yil yakunlariga ko'ra, aholisining katta qismini uyg'urlar tashkil etadigan Shinjon provenciyasidan Xitoyning turli yoshdagi terma jamoalariga 15 nafar futbolchi jalb etilgan, Xitoy Superligasining 11 jamoasida esa 25 nafar qardoshimiz to'p tepgan.

Jumladan, kecha asosiy tarkibda ko'rinish berganlardan – Bahrom Abduvali milliy terma jamoasi safida 9 o'yinda maydonga tushib, Tailand va Indoneziyaga qarshi bellashuvlarda o'z nomini tabloga yozdirishga muvaffaq bo'lgan. U 2023 yil Xitoy tomonidan "Golden Boy" sovrini uchun nomzod sifatida ko'rsatilgan.

Qiziq jihati, Bahrom Abduvali, Mutalib Imonqori 2023 yil Toshkentda o'tkazilgan U-20 Osiyo kubogida ishtirok etgan. O'sha tarkibda Afrden Asqar jamoa sardori bo'lgan, shuningdek, Mavlon Majid, Abdulla Odil, Sherzod Nur kabi yoshlar jamoa o'zagini tashkil etgan.

Dunyodagi har qanday mahsulotning arzon variantini aql ila kashf etayotgan xitoyliklar yashil maydonda hisob-kitoblarning o'zi kamlik qilishini anglab etdi va mamlakat aholisi hisoblangan tug'ma pahlavon, qoni qaynoq turkiy qavmlarni integraciya qilish yo'lidan bormoqda. Umuman olganda, kelajakdagi Xitoy terma jamoasi asosini uyg'ur yigitlari tashkil etsa, ajablanmayman.

Oqil Abdubarnoev