Aybek Nurbaev: "Jayxun" futbolchilari mahalliy bolalardan tuzilgan, aksariyati endi futbolga qadam bosgan"
16 okt 18:40
Yangiliklar

Aybek Nurbaev: "Jayxun" futbolchilari mahalliy bolalardan tuzilgan, aksariyati endi futbolga qadam bosgan"

Pro liganing 17-turidan joy olgan "Olimpik" – "Jayxun" (3:1) uchrashuvdan so'ng mehmonlar bosh murabbiyi Aybek Nurbaev fikrlarini bildirib o'tdi.

"Avvalambor, "Olimpik"ni bugungi g'alaba bilan tabriklayman. Ulan anchadan beri bunga erisholmayotgandi. Jamoaga keyingi o'yinlarda ham omad tilayman. "Olimpik"ning o'yinini tahlil qilib, bahsga astoydil tayyorlangandik. Yigitlarimizga etiroz yo'q. 10 kishi bo'lib qolsak-da, munosib o'yin ko'rsatishdi. Qo'pol xatolar evaziga gollar o'tkazib yubordik. To'g'risini aytsam, bolalarga tajriba etishmayapti. Zamonaviy futbolga yondashishga va yaxshi mashg'ulotlar o'tkazib, tayyorgarlanyapmiz. Biroq o'yinda hammasi ham o'xshamayapti. Uydagi va mehmondagi o'yinlar farq qilmoqda. Buni safar bilan bog'lamoqchi emasman. Shunchaki to'g'ri futbol o'ynash kerak. Bizga jamoa shakllanishi uchun 1-2 yil vaqt kerak. "Jayxun" futbolchilari mahalliy bolalardan tuzilgan, aksariyati endi futbolga qadam bosgan. Keyingi ikki turni — "Lokomotiv" va "FarDU"ni uyda qabul qilamiz. Buyog'iga shu o'yinlarga tayyorgarlik ko'ramiz", – dedi Nurbaev.

- Birinchi bo'limda "Olimpik" ustunlik qildi, ikkinchi bo'limda esa "Jayxun" ustunlikni qo'lga oldi. Sizlar mezbonlarning ikkinchi bo'limdagi sarosimasidan foydalanib ketishingizga nima xalaqit qildi? Jamoangiz hisobda oldinga chiqib olishi mumkin edi...

- Birinchi taymda o'yinga moslashish qiyin kechdi. Ikkinchi taymda bir yo'la 3 ta o'zgarishga qo'l urdik. Bu bizga foyda berdi. Zaxiradan tushirgan futbolchimiz gol urdi. Keyin diqqat-etiborni yo'qotdik va gollar o'tkazdik. Bu uchinchi yoki to'rtinchi o'yindayoq ro'y bermoqda. Bolalarda tajriba yo'q, ayniqsa, himoyada ko'p muammolarimiz bor. 10 kishi bo'lib qolganimizdan keyin baribir hujumga o'tishga to'g'ri keldi. To'g'risini aytsam, hech bo'lmasa durangni ko'zlagandim. Shuning uchun himoyachi o'rniga hujumchini maydonga tushirgandim. Bugun ham "Aral" bilan o'yindagi singari bir kishi kam qoldik va ketma-ket gollar o'tkazdik. Hamma yigitlar va qizil kartochka olgan futbolchimiz bilan gaplashib olamiz. Ketma-ket ikkita o'yinda chetlatish yuzaga kelmoqda, bu yaxshi emas. Shu tufayli jamoa qiyin ahvolda qolmoqda. Yigitlar harakat qildi, bu bo'yicha etiroz yo'q.