Angliya Superkubogi. "Manchester Siti" - "Arsenal". Prevyu
06 avg 2023 15:57
Yangiliklar

Angliya Superkubogi. "Manchester Siti" - "Arsenal". Prevyu

Bugun "Uembli"da Angliya Superkubogi orqali mamlakatda katta futbol start oladi.

Xo'sh, ushbu bahsga qadar ikki jamoaning holati, tayyorgarligi qanday bo'ldi?

"Manchester Siti"

1. "SHaharliklar" faqatgina uch o'rtoqlik o'yinini o'tkazdi

Jamoaning mavsumga tayyorgarligi unchalik darajada kuchli bo'lmagandek ko'rinadi. "SHaharliklar" o'tgan mavsumda trebl qayd etganidan keyin yoz oyini anchagina sokin o'tkazdi. Balki o'tgan mavsumda ko'p o'yin o'tkazgani sababli Gvardiola o'z shogirdlariga ko'proq dam berishni istagandir. CHunki jamoa faqatgina Osiyo turnesida ishtirok etdi va unda 3tagina o'rtoqlik o'yinida qatnashdi - 2 g'alaba va 1 mag'lubiyat.

2. De Bryuynening uchrashuvda o'ynamasligi mumkin, Akening o'yindagi ishtiroki qatnashishi so'roq ostida

O'rtoqlik o'yinlarida Pep Gvardiola futbolchilar va taktikalarda tajribalar o'tkazib ko'rdi. Jamoa barcha o'yinlarda 3-2-2-3 taktikasida o'ynadi. SHu sababli ECHL finalida olgan jarohatidan hali ham qutulmagan Kevin de Bryuynega bugun tarkibdan joy topilmasa kerak. "Bavariya"ga qarshi o'rtoqlik o'yinida esa Natan Ake kichik jarohat orttirib oldi va shu sababli "Atletiko"ga qarshi o'ynamadi. Bugun esa uning o'yinda qatnashishi so'roq ostida. Biroq Gvardiola himoyasida variantlar juda ko'p. SHuningdek, jamoaga yangi kelgan Yoshko Gvardiol ham o'yinda ishtirok etishi mumkin (biroq ehtimoli juda past).

3. "Manchester Siti"ning "Arsenal"ga qarshi o'yinlarda g'alabali seriyasi bor

Mikel Arteta kelganidan keyin "Arsenal"ning "Siti"ga qarshi o'yinlarida principiallik oshdi - hozircha shogird ustozini hayron qoldiryapti, ammo undan o'zib keta olmayapti. Arteta va Gvardiola jamoalari turli turnirlarda 9 marta to'qnash kelgan bo'lsa, ularning faqatgina bittasida omad londonliklar uchun kulgan. Ayniqsa, o'tgan mavsum o'zaro o'yinlarda "Siti" raqiblaridan bir bosh ustunlik qildi va ikkala o'yinda umumiy 7:2 hisobi bilan g'alabaga erishdi.

"Arsenal"

1. "Arsenal" mavsumga yaxshi tayyorlandi

Raqibidan farqli ravishda "Arsenal" mavsumlar oralig'ini aktiv o'tkazdi. "Kanonirlar" turli darajadagi raqiblari bilan 6ta o'rtoqlik o'yinida ishtirok etdi va ularning faqatgina bittasida mag'lub bo'ldi. Undan tashqari, London klubi transferlar oynasida ham faol bo'ldi va Deklan Rays, Yurrien Timber hamda Kay Xavertc kabi futbolchilarni tarkibiga qo'shib oldi.

2. Saka o'ynashi mumkin, Jezus va Zinchenkoda jarohat bor

Arteta ham mavsumoldi yig'inlardagi o'yinlarda tajribalar o'tkazdi, biroq sxemada emas, balki, futbolchilarning rolida. Yangi mavsumda ham uning jamoasi 4-3-3 sxemasida o'ynashi kutilmoqda. Eng asosiy savol Kay Xavertcning poziciyasiga borib taqaladi. U universal futbolchi, biroq hali barqarorlik namoyish qila olmadi. Arteta uni chap qanot vingeri va markaziy hujumda sinab ko'rishga ulgurdi. Umuman olganda bugungi bahsni u zaxirada boshlashi ehtimoli yuqori. Jarohatlangan Jezusning o'rnida esa Nketia o'ynashi kutilmoqda. SHuningdek, Zinchenkoning o'ynamasligi Timberga katta imkoniyat bo'lishi mumkin.

3. "Arsenal" Superkubok o'yinlarida juda omadli

Garchi o'zaro o'yinlarda "Arsenal" "Siti"dan o'zib keta olmasada, Superkubok o'yinlarida muvaffaqiyatli o'ynab kelgan. Jamoa o'zining shunday to'rt finalida g'alaba qozongan - 2020 yili "Liverpul", 2015 yili "man Siti" kabi jamoalar mag'lub etilgan. Fakt shundaki, "Arsenal" o'zi qatnashayotgan Superkubok o'yinlarida juda omadli jamoa.