Aleksandr Xomyakov: "Futbolda har doim yutavermaysiz. Menimcha, ofsayd yo'q edi, lekin men ekspert emasman"

"Paxtakor"ni tabriklab qo'yishim kerak. Ularga OCHLda omad tilayman. Muxlislarimizga rahmat. Tomoshabop futbol bo'ldi deya olmayman, ammo bu final va birgina vaziyat o'yin taqdirini o'zgartirib yuboradi. Yigitlar kurashishdi va borini berishdi, ammo bugun g'alaba raqibga nasib etdi" - dedi Aleksandr Xomyakov.

— "Buxoro"ning goli bekor qilingan vaziyat haqida gapirsangiz. Vaziyat takrorini ko'rishga ulgurdingizmi?

— O'sha vaziyatda "passiv" ofsayd bor ekan deyishmoqda. Ekspertlar va hakamlar bor. Mening fikrim ularniki bilan bir xil bo'lmasligi mumkin. Menimcha, ofsayd yo'q edi, lekin vaziyatni hal qilmayman va ekspert emasman. To'g'ri, alamli mag'lubiyat, lekin biz hujumda agressivroq o'ynashimiz mumkin edi.

— Bashar Resanga sariq kartochka ko'rsatilgan vaziyatda-chi?

— Menga hamma narsa bordek tuyulaveradi. Birinchi bo'limda Po'latovga nisbatan ishlatilgan qo'pollik uchun qizil kartochkani ko'rsatish mumkin edi. Hakamlarning darajasi yuqori va ularda tajriba katta.

— Hissiyotlarga boy o'tgan o'yindan so'ng "Buxoro"ning ayrim futbolchilari yig'layotganini ko'rdim. Kiyinish xonasida futbolchilarga nima dedingiz? Hali oldinda chempionat o'yinlari bor, yigitlarni qanday ruhlantirmoqchisiz?

— Bunday vaziyatda hech qanday so'z shart emas. Yigitlarimiz professional, ularni tinchlantirib o'tirishning hojati yo'q. Uch kundan keyin yana o'ynaymiz. Bir narsani tushuning, futbolda har doim yutavermaysiz. Buning iloji yo'q. Shunday mag'lubiyatlar yosh futbolchilarimizga katta saboq va tajriba bo'ladi degan umiddaman. Hayot adolatsiz. Mana shunday vaziyatlar o'z hayotidagi bir nimaga intiladigan insonlarga yaxshi tajriba bo'ladi.

— O'yindan oldingi atmosfera qanday edi? "Paxtakor"ga favorit sifatida qaraldimi? O'yindan so'ng Kolakovich yig'laganini ko'rdim va bu holat meni hayron qoldirdi. Bizda ko'pgina legionerlar pul ishlash uchun keladi. Kolakovich esa xuddi yosh boladek ko'z yoshlarini tiyib tura olmadi.

— Tushuning, futbol sovrin yutish uchun o'ynaladi. Hozirgi kunda futbolchidan qaerda o'ynagansan deb emas, nima yutgansan deb so'raladi. Har doim nima yutgansan deb so'rashadi. Kolakovich ancha yillardan beri O'zbekistonda to'p tepib kelmoqda va shu sababli u o'z nomini tarixdan joy olishni istagandir. Biz muxlislarimiz va oilamiz uchun o'ynadik. To'g'ri, raqib ancha kuchli edi, lekin qo'rquv yo'q edi. O'yindan oldin natija qanday bo'lishini bilmaysiz. Faqatgina o'yindagi harakatlarga etiborli bo'lishni so'radim. Yoshlik chog'ingizda ko'chada qanday ishtiyoq bo'lgan futbol o'ynagan bo'lsangiz, bugun ham shunday xohish va ishtiyoq bilan o'ynanglar dedim.