Шомуродов тавсияси билан Сурхондарё вилояти футбол академиясига спорт директори тайинланди

Авезов Отажон Бобоқулович - 1980 йилда Бухоро вилоятида туғилган. Узоқ йиллар давомида "Машъал", "Бухоро" футбол клублари ва академияларида фаолият олиб борган.

Шу куни Ўзбекистон терма жамоаси сардори Элдор Шомуродов ҳамда Отажон Авезов иштирокида Сурхондарё вилояти футбол академияси мураббийлари билан учрашув бўлиб ўтди.

Элдор Шомуродов ўзининг халқаро тажрибаси асосида мураббийларга фойдали маслаҳатлар берди ҳамда жамоавий иш муҳимлигини таъкидлади.

Айтиш жоизки, Отажон Авезов шахсан Элдор Шомуродов таклифига биноан, спорт директори вазифасига таклиф этилди. У ёш футболчиларни аниқлаш, уларни профессионал даражага олиб чиқиш ҳамда мураббийлар билан самарали тизимда ишлаш бўйича катта тажрибага эгадир.

Унинг бошчилигида академия олдига қуйидаги мақсадлар қўйилмоқда:
- Футболчилар салоҳиятини максимал даражада очиб бериш
- Иқтидорли ва истиқболли футболчиларни саралаб олиш
- Европа дастури асосида мураббийлар салоҳиятини ошириш жаҳон стандартларига мос тайёргарлик тизимини шакллантириш
- Тизимли ягона дастур асосида машғулотларни ташкил этиш
- Спорт диетологияси билан машғулотларни тартибга солиш