Муҳаммадкарим Тоиров: "Ўйиндан сўнг бўлиб ўтган ишларни ўйлаб ғалаба ҳам кўнглимга сиғмади"

Гап "Андижон" - "Бунёдкор" учрашувидаги қизил карточка кўрсатилган вазият ҳақида кетмоқда. Унда қатнашган Усмонали Исмоналиев, Фарҳод Бекмуротов ўз фикрларини билдирди. Биз ўша вазиятдаги яна бир футболчи Муҳаммадкарим Тоировга ҳам юзландик. 

"Авваламбор, барча Ўзбекистон халқини кириб келган Рамазон ойи билан муборакбод этаман. Шу билан бир қаторда, жонкуяр муҳлисларимизни янги мавсум бошланганлиги билан табриклайман. “Бунёдкор” жамоаси қарши ўйинга келадиган бўлсам, футболда ҳамма нарса кузатилиши мумкин экан. Тўғрисини айтсам фаолиятимда бундай ҳолатга биринчи маротаба тушушим. Очиғи Усмонали Исмоналиев билан ўртамизда бўлиб ўтган вазиятда жуда аросатда қолиб кетдим, сабаби майдонда рақиб бўлсак-да, лекин хаётда яқин акам. Ёшликдан бирга катта бўлганмиз, бош ҳакам қизил карточка бергандан сўнг, Азиз Асимовга мен билан хазиллашганини тушунтирмоқчи бўлдим. Аммо бош ҳакам ўз қарорини чиқариб бўлган эди. Ушбу ҳолат мен учун катта сабоқ бўлди ва майдонда профессионалларга хос тарзда ўзимизи тутушимиз кераклигини тушуниб етдим.

Биласизми, ўйиндан сўнг бўлиб ўтган ишларни ўйлаб ғалаба ҳам кўнглимга сиғмади. Усмонали Исмоналиевни ёнига бориб узр сўрадим, нима бўлган тақдирда ҳам хаётда, футболдан ташқарисида менинг энг яқин акам ҳисобланади. Шу фурсатдан фойдаланиб айтмоқчиманки, бизни қўллаб қувватлаган жамоамизнинг ашаддий ишқибозларига ўз ташаккурларимни айтаман",- дейди Муҳамадкарим Тоиров Championat.asia мухбири билан суҳбатда.