Достон Ҳамдамов Суперлигада қайси жамоалар кучли учликдан жой олишини айтди

27 ёшли футболчи жорий мавсумга тайёргарлик, жамоа мақсади ҳамда чемпионат охирида қайси жамоалар совриндорлар сафидан ўрин эгаллаши тўғрисидаги фикрлари билан ўртоқлашди.

"Янги мавсумга тайёргарлик аъло даражада ўтмоқда. Туркиянинг Анталия шаҳрида ўқув-йиғин машғулотларини олиб бордик. Худо хоҳласа, чемпионатнинг илк турини ғалаба билан бошлаб, охиригача шу зайлда борамиз. 

"Пахтакор" асосий эътиборини ёшларга қаратган. Ёшларимиз жуда яхши. Улар ҳам ўз иқтидорини кўрсатиб, ғалабалар учун ёрдам беради. 

Ўйлашимча, "Пахтакор", "Насаф" ва "Навбаҳор" Суперлига янги мавсумида ҳам кучли учликдан жой олади.

Биз рақиб танламаймиз, барчасига жиддий эътибор қаратамиз. 

Илк учрашувни мухлисларимиз қаршисида ўтказиш ёқимли. Ғалаба билан уларни хурсанд қилишга ҳаракат қиламиз", деди ярим ҳимоячи.

Эслатиб ўтамиз, "Пахтакор" Суперлигадаги илк ўйинини 4 март куни "Сурхон"га қарши ўтказади.