Доннарумма агенти Нойернинг Мусиала жароҳати ҳақидаги сўзларига: "Мануэль 2014 йилда Игуаинни урганда ҳам, жароҳатланиш хавфини билиб турган"

Шанба куни ПСЖ клублар жаҳон чемпионати 1/4 финалида "Бавария"ни (2:0) мағлуб этди.

Биринчи таймнинг охирида Жамал Мусиала ПСЖ жарима майдонида Жанлуижи Доннарумма билан тўқнашувда оғир жароҳат олди – "Бавария" ярим ҳимоячисининг чап оёғи синди. Мусиалани стадиондан шифохонага олиб кетишди.

Ўйиндан сўнг Нойер бу эпизодда Доннарумма ҳаракатлари ва унинг кейинги хулқ-атворини танқид қилди: "Бундай ўйнашнинг ҳожати йўқ эди! У жароҳат етказиши мумкинлигини тушунди. Мен Жанлуиджига шундай дедим: "Ундан узр сўрамайсанми?" Мен бошқача реакция қилган бўлардим".

"Аслида мен Нойерни тушунаман. Тибо Куртуа айтганидек, у жамоадошини ҳимоя қилиши оддий ҳолат. Нойер бошқача ҳаракат қилиш мумкинлигини айтгани ҳам тўғри. Бу рост, лекин биз ҳаммамиз турлича ўйлаймиз, ҳар ким ўзича йўл тутади. Бу дарвозабонлар ва ҳужумчилар ўртасидаги абадий дуэллардан бир эди.

Декабрда Жижи (Доннарумма) "Монако" ўйинчиси (Вилфрид Синго) билан тўқнашувда кўзини йўқотишга оз қолганди. Нойер 2014 йилда терма жамоалар ўйинида (Германия ва Аргентина ўртасидаги жаҳон чемпионати финалида) Игуаинни урган. Гарчи ўз жамоаси учун хавфни олдини олишни хоҳлаган бўлсада, рақибга жароҳат етказиш хавфини билиб турганини тан олган", – деди Винченцо Райола.