"Ал Иттиҳод" сафига қайтган Бенземадан сардорлик боғичи олиб қўйилди, "Ал Айн" эса Эркинов жамоасини кубокдан чиқариб юборди

Турнирнинг нимчорак финалида Ўзбекистон шарафини икки клуб — "Насаф" ва "Навбаҳор" ҳимоя қилмоқда. Иккала жамоа ҳам ўз мухлислари қаршисида ўтган илк беллашувларда нурсиз дурангга рози бўлишди. Эндиликда ўзбек клублари сафар ўйинларида майдонга тушишади. Жумладан, "Насаф" Бирлашган Араб Амирликларининг "Ал Айн" клуби меҳмони бўлса, "Навбаҳор" Саудия Арабистонининг "Ал Иттиҳод" жамоаси билан тўқнаш келади.

Бўлажак учрашувлар олдидан Ўзбекистон клубларининг рақибларидаги вазият тўғрисида маълумот тақдим этамиз.

"Ал Айн"

"Насаф"га қарши жавоб учрашуви олдидан амирлик жамоаси Президент кубоги 1/8 финалида ўзбекистонлик ярим ҳимоячи Ҳожимат Эркинов тўп тепаётган "Ал Ваҳда"га қарши баҳс олиб бориб, Матиас Паласиоснинг 87-дақиқада урган голи эвазига ғалаба қозонди. "Ал Ваҳда" таркибида Ҳожимат Эркинов учрашувда тўлиқ ҳаракат қилди ва 75-дақиқада ҳакам томонидан огоҳлантирилди.

Шунингдек, "Ал Айн" жамоанинг асосий ва вице-сардорлари — Бандар Ал Аҳбаби ва Холид Эйса билан амалдаги шартнома муддатини узайтирди. Бироқ янги битим муддати ошкор қилинмади.

Эслатиб ўтамиз, "Ал Айн" — "Насаф" учрашуви 21 февраль куни Тошкент вақти билан соат 21:00 да бошланади.

"Ал Иттиҳод"

Марсело Гальярдо шогирдлари "Навбаҳор"га қарши жавоб ўйини олдидан Саудия Арабистони чемпионатида "Ал Риёд"га қарши майдонга тушиб, Ҳамдаллаҳнинг дубли эвазига 2:0 ҳисобида ғалаба қозонди. 

Мазкур баҳсни Наманганга олиб кетилмаган жамоа юлдузи Карим Бензема асосий таркибда бошлади ва 71-дақиқада алмаштирилди. 

SofaScore портали берган баҳога кўра, Бенземанинг хатти-ҳаракатлари 6,3 баллга лойиқ кўрилган ва бу "Ал Иттиҳод" бошланғич таркиби ва захирадан ўйинга қўшилганлар ичида энг ёмон кўрсаткич бўлган.

Сўнгги янгилкларга кўра, жамоанинг аргентиналик бош мураббийи Марсело Гальярдо Карим Бенземани сардорлик боғичидан маҳрум қилган. "Ал Риёд" билан ўйинда жамоани мисрлик ҳимоячи Аҳмад Хегази майдонга бошлаб тушган.

Эслатиб ўтамиз, "Ал Иттиҳод" — "Навбаҳор" учрашуви 22 февраль куни Тошкент вақти билан соат 21:00 да бошланади.