Афсуски, 4 кун олдин майдонда хушини йўқотган 27 ёшли футболчи вафот этди
28 aug 13:13
News

Афсуски, 4 кун олдин майдонда хушини йўқотган 27 ёшли футболчи вафот этди

24 август куни Либертадорес кубоги 1/8 финали доирасидаги "Сан-Паулу" - "Насьонал" ўйинининг 84-дақиқасида уругвайликлар ярим ҳимоячиси Хуан Искьердо майдонда хушини йўқотиб йиқилган эди.

Кейинчалик уни шифохонага олиб кетишган ва у жонлантириш бўлимида шифокорлар назоратида бўлиб турган эди.

Либертадорес Кубоги учрашуви вақтида ноҳуш ҳолат рўй берди

"Насьонал" клуби матбуот хизмати бугун 27 ёшли ярим ҳимоячи вафот этганини эълон қилди. Футболчи юракдаги муаммо сабаб оламдан ўтди.

"Футбол клубимиз қалбларимизда чуқур қайғу ва изтироб билан севимли футболчимиз Хуан Искьердо вафот этганини эълон қилади.

Унинг оила аъзолари, дўстлари, ҳамкасблари ва қариндошларига самимий ҳамдардлик билдирамиз. Бутун "Насьонал" унинг ўрнини тўлдириб бўлмас жудолиги учун мотам тутади. Хуан, сен биз билан абадий бирга бўласан", - деб ёзилган клуб расмий баёнотида.