“Менимча, асосий рақиблардан бири билан унинг майдонида дуранг ўйнаш ёмон натижа эмас. Ўзбекистон Осиёдаги етакчи термалардан биридир. Учрашув тенг курашлар остида кечди. Шу сабабли ҳам ўйинда дуранг қайд этилди. Ишқибозлар бугун мезбонларни ажойиб тарзда қўллаб туришганини алоҳида айтиб ўтмоқчиман. Ўйлайманки, дастлабки икки беллашувда яхши натижаларга эришдик” – дейди Ацуто УЧИДА “Чемпионат.уз”га.

 
Жамоанинг японлаштирилган асли келиб чиқиши голландиялик бўлган Майк ХАВЕНААРнинг Ўзбекистон билан бўлиў ўтган ўйин ҳақидаги фикрлари қуйидагича кўриниш олди:
– Биринчи таймда мезбонлар яхшироқ кўзга ташланишди. Биз эса танаффусдан кейин суръатни оширдик ҳамда кўплаб хавфли вазиятларни юзага келтирдик. Меҳмонда гуруҳдаги асосий рақибдан бири билан дуранг ўйнаш қониқарли деб баҳоланади. Майдонга тушганимдан сўнг уч бор гол уриш имконияти бўлди. Бироқ ўша ҳолатларда дарвозабон маҳорат кўрсатди. КХДР билан солиштирсак, Ўзбекистон анча кучли ўйин намойиш қилди.

Бугунги ўйиннинг энг яхши ўйинчиларидан бири бўлган Одил Аҳмедовга "Анжи"даги ярим йиллик фаолияти қанчалик кўп фойда берганига ўзимиз гувоҳи бўлдик.

"Авваллари кучли рақиб олдида бироз эсанкираб қолардик. Ҳозирги Ўзбекистон терма жамоаси эса рақиб ким бўлмасин, фақат ва фақат ғалаба қозониш учун майдонга тушишга кўникиб қолди. Бугун стадионга келадиган мухлислар кўп бўлишини ҳаммамиз яхши билар эдик. Шунинг учун уларнинг олдида ўз вазифамизни бажаришимиз ва ўйинда ижобий натижага эришишимиз керак эди. Ўйиннинг илк дақиқалари бизни устунлигимизда ўтди. Бугун барча футболчиларимиз яхши ҳаракат қилдилар. Афсуски, кичик хато натижасида ўз дарвозамиздан тўп олиб чиқишга мажбур бўлдик" - дейди Одил Аҳмедов.

- Илк маротаба "Пахтакор" стадионида легионер футболчи сифатида тўп тепдингиз...
- Ҳа. Жонажон стадионимда яна бир бор футбол ўйнаганимдан ўзим ҳам хурсандман. Менимча, бугунги ўйин мухлисларга манзур бўлди. Стадионда норози оҳангдаги товушларни эшитмадим. Бунинг учун жамоамиз номидан Ўзбекистон терма жамоасини қўллаб-қувватлаётган ва бизга катта ишонч билдираётган ишқибозларга миннатдорчилик билдираман.
 

- Осиё Кубогидаги Японияга нима етишмади деб ўйлайсиз?
- Шунчаки биз кучли ўйнадик. Биздаги ғолиблик руҳи уларникига нисбатан кўп эди.

 

Альберто Заккеронидан сўнг журналистлар саволлларига жавоб берган Вадим Абрамов натижадан қониқиш ҳосил қилганлигини айтиб ўтди.
- Тўғри, бугун ғалаба қозонсак ҳам бўларди. Бунинг учун жуда яхши имкониятга эга ҳам бўлгандик. Лекин ўйиндаги шошқалоқлик бизга панд бериб қўйди. Аслида Япония терма жамоаси билан дуранг ўйнаш ҳам ёмон натижа эмас. Японияда бўлиб ўтадиган ўйинда ғалаба қозонишга ҳаракат қиламиз.

Таркибдаги қария ўйинчилар ва кела олмаганлар борасида, бош мураббийимизнинг фикри қуйидагича кўриниш олди:
- Агар Бикмаев керак бўлганида биз уни чақириб олган бўлар эдик. Ҳозир унинг қуйи дивизионда муҳим ўйинлари бор. Терма жамоага келиб захирада ўтиргандан кўра, ўз жамоаси сафида ҳаракат қилгани фойдали. Билингки, сафимиздан ўрин олмаган ҳар қандай футболчи учун захирамиз бор. Бугун фахрийларимиз яхши ўйнадилар. Ёшларнинг хизматидан фойдалансак бўларди. Аммо улар бундай ҳал қилувчи ўйинда ўзларини йўқотиб қўйишлари ҳам мумкин эди.

Нодирхўжа Юлдашев ва Беҳзод Назаров суҳбатлашдилар